అసలైన చదువు

చదివిన చదువుల యందున
చదు వెది మస్తిష్కమందు స్థాపింపబడున్ -
చదువరి కదియే చదువయి
కదలుచు తన వెంట, తగిన గౌరవ మొసగున్! 

మహనీయ భావజాలం ...

మనుజులు జనియింత్రు, మరణింత్రు; దేశముల్
పెరుగు, తరుగు మరియు విరుగు గాని -
మంచి పెంచునట్టి మహనీయు లందించు
భావజాల మెపుడు బ్రదికియుండు!  

లౌక్యముగ కైత లల్లెడి లౌల్య మేల?

ఎవరురా నాలోన ఇన్నిన్ని భావాల
వెలయించుచున్నది వెల్లువెత్తి -
ఎవరురా నా నోట ఇన్నిన్ని శబ్దాల
ఒలికించుచున్నది ఊట గట్టి -
ఎవరురా నా చేత ఇన్నిన్ని పద్యాల
పలికించుచున్నది వరుస బెట్టి -
ఎవరురా నాకింత ఇలలోన ప్రఖ్యాతి
కలిగించుచున్నది కరుణ గల్గి -

అద్ది నా యమ్మ ’శ్రీవాణి’ అమిత కృపయె!
ఇంక రచియింతు నిర్భీతి నెల్ల నిజమె!
"ఎవ్వరొ - నిరాదరింతురో ఏమొ - " యనుచు
లౌక్యముగ కైత లల్లెడి లౌల్య మేల?

'పూవులకే పూజ'

పూవుల తోడ దేవునికి పూజలు సేయుట చూతు మెల్లెడన్ -
పూవులకే యొనర్తు రిక పూజలు మా 'తెలగాణ' మందునన్!
కోవెల గట్టినట్లు, పలు కోమల వర్ణ సుశోభితంబులౌ
పూవుల బేర్చి, సల్పుదురు పూజలు స్త్రీల్ 'బతుకమ్మ' పేరిటన్!

జీవనయాత్ర ... !

జీవనయాత్రలో "బ్రతుకు జీవుడ!" యంచు నెదో భుజించి, నే
కావలె నిద్ది యద్ది యని కాంక్షలు లేక, యదెట్లు సాగునో -
యా విధి సాగిపోవుచు, మదాత్మకు తృప్తిని గూర్చు కోసమై
నా విధులన్ నిబద్ధముగ నా తల దాలిచి, యాచరించితిన్!