"హోళి"

ఇంద్ర ధనువు కరిగి ఇల జారె వర్ణాలు -

జనులు మోములందు చల్లుకొనగ!

"హోళి" పర్వ దినము నుత్సాహ ముప్పొంగె -

అందరికి శుభాభినందనములు

మైత్రి

 మైత్రి యన్న దొక్క మంచి పుస్తక, మందు

నుండ గల దపార్థ మొక్క పుటగ!

ఒక్క పుటను గూర్చి ఉన్న పుస్తకమును

మొత్తమున్  విడుచుట మూర్ఖతగును!!

కిటుకు

ఎవ్వరినైన నీ విష్టపడిన - వాని

          ఉల్లమలర, ప్రేమ నొలుకు మెపుడు!

ఎవ్వరినైన నీ విష్టపడని యెడ -

          తొలగి పో వానికి దూరముగను!

ఎవరైన నీవన్న ఇష్టపడిన - వాని

          కడు ప్రేమ మీరగా గౌరవించు!

ఎవరైన నీవన్న ఇష్టపడక యున్న -

          "ఓహో! సరే!" యని ఒప్పుకొనుము!

మానవుడు తన జీవన మార్గమందు

ఎపుడు సంతోషముగ నుండ నిదియె కిటుకు!

ఈ సమాజమందున ఎవ్వ డెప్పు డెట్టు

లింక ఏమన్న  గాని - బాధేమి లేదు! #