వేలిముద్రగాడు విద్య నేరిచి, నాడు
సంతకమ్ము జేయు స్థాయినందె!
సంతకములవాడు సాంకేతికత హెచ్చి,
వేలిముద్ర తిరిగి వేయు నేడు! #
వేలిముద్రగాడు విద్య నేరిచి, నాడు
సంతకమ్ము జేయు స్థాయినందె!
సంతకములవాడు సాంకేతికత హెచ్చి,
వేలిముద్ర తిరిగి వేయు నేడు! #
"సాధ్యము కా"దటంచు పలుసారులు పల్వురు పల్కినంతటన్ -
వధ్యశిలన్ తలల్ నిలుపువారిని గాంచిన భ్రాంతి నా కగున్!
"సాధ్యము కా"దటందు రొక సాకుగ నీ అసమర్థు లెప్పుడున్!
సాధ్యము కానిదేది? భువి సాధ్యమె సర్వము శక్తి, యుక్తితోన్! #
క్రూరాత్ముం డక్కట! వదినెకే ద్రోహమే జేయ బూనెన్ -
ఘోరంబౌ రీతిటుల మదిలో కుంద, నా వస్త్ర మీడ్చెన్ -
రారా కృష్ణా! పడతి కిడి సంరక్ష, మానంబు గావన్!
ఈరా వస్త్రంబు! చెలియలు న న్నీవె వేగంబె ప్రోవన్! #
ఆట పాటల నాడు నట్టి బాల్యము నందె
తాటకాద్యసురుల తంపులాయె!
ముదితతో పెండ్లైన మురిపె మారక ముందె
పరుశురాముని తోడ పంతమాయె!
రాజ్యాధికారమే రానున్న వేళలో
వనవాస దీక్షయే ప్రాప్తమాయె!
పర్ణశాలను జేరి ప్రణయ మందక ముందె
భార్యాపహరణ దౌర్భాగ్యమాయె!
సతి విముక్తి కొరకు పెద్ద సమరమాయె!
లోక నింద, సతి వియోగ శోకమాయె!
బ్రదుకు కష్టాల వరదైన - రఘు కులుండు
వెరవ కాయె తా నొక ధర్మ విగ్రహమ్ము! #
పొగడికలను మించునటు నీ పోరు సలిపి,
ప్రతిఫలమునకు మించిన పని నొనర్చి,
ప్రస్తుతము కన్న మిన్నగా భావి నిలుప
వ్యక్తి నిరతమ్ము కృషి జేయ - వరలు వృద్ధి! #
ధరణి నెట్టి కష్టాలైన తరుము తెగువ;
నీతి, నియమాల హృదియందు నిలుపు నడత;
నడుమ నడుమ నవ్వించుచు, నవ్వు చొరవ;
మమత గురిపించు సుగుణమ్ము మగని కున్న -
ధనము, చదువును, పదవి, అందమును, కీర్తి -
అధికముగ లేకపోయిన, నతివ మెచ్చు!
అవియు సైతము గూడెనా .. ఆమె యింక
పట్ట పగ్గాలు లేనట్లు పరవశించు! #
"పదికి నడుమ సున్న వ్రాయ నేమౌ?" నన -
"వంద" యను నొకండు; "పంది" యొకడు!
ఎవని చిత్త వృత్తి యేరీతి సాగునో -
ఫలిత మటులె యబ్బు వాని కపుడు! #
చిన్న కలము నిలుపు చిరకాల గతమెల్ల -
వ్రాసి పెట్టుకొన్న, శ్రద్ధ తోడ!
మరచిపోవుదాని మరల జ్ఞప్తికి దెచ్చు -
అక్షరములు! నిజమె - అక్షరములు!! #
ఏ దేశ మ్మొకనాడు భారత భువి న్నేలెన్ శతాబ్ది ద్వయం,
బా దేశమ్ము - "బ్రిటన్"కు పాలకుడయె న్నాశ్చర్యమై, భారత
ప్రాదేశంపు సువారసత్వ ఘనతన్ ప్రాప్తించు ప్రాజ్ఞత్వ స
న్నాదానంద యశస్వియౌ "రిషి సునాక్" నాముండహో నేడికన్!
బ్రిటిష్ నూతన ప్రధాని శ్రీ "రిషి సునాక్" మహోదయునికి శుభాభినందనలతో ...
- డా. ఆచార్య ఫణీంద్ర
అంకగణిత మందు నంకె "తొమ్మిది" గ్రుద్దె
నంకె "యెనిమిది" వీ పదరునట్లు!
"ఏల కొట్టితి?" వంచు "నెనిమి" దడుగ - నద్ది
"పెద్దదాన" ననుచు విర్ర వీగె!
"ఎనిమి" దపుడు గ్రుద్దె "నేడు" నుక్రోషాన!
"ఏడు" నట్టులె "యారు"; నిట్లె యన్ని!
ఉరికి పారెడు "సున్న" "నొకటి" యాపి - "భయము
వల" దటంచును, తన ప్రక్క నిలిపె!
"రెండు" చూచు సరికి "పది" యుండె నచట!
బెదరి "రెండు" తానే పారు, టదియె గాంచి,
"సున్న" "యొకటి"తో నపుడనె, స్తుతిని జేసి -
"పెద్ద యగుదు రితరులను పెద్ద సేయ!"
ఇరువు రొకరి నొక్క రెరిగి, ద్వేషము గల్గి,
స్వీయ ఖడ్గములను దూయకుండ -
పరిచయమ్ము నింక పగ లేని వీరులన్
"చంపుకొమ్మ"నుటయె - "సమర" మంద్రు! #
బోనము స్వీకరించి, పరిపూర్ణముగా తెలగాణ రాష్ట్రమున్ -
జ్ఞాన సమృద్ధియున్, సుగుణ సాంద్రత గల్గు ప్రజాళి నింపి, స
మ్మానము నొందు రీతి నసమానముగా నభివృద్ధి జేయుచున్,
వేనకు వేల సంపదల వెల్గగ జేయుము తల్లి శాంభవీ!
అందరికీ బోనాల పండుగ శుభాకాంక్షలతో ...
- డా. ఆచార్య ఫణీంద్ర
రాజ్యము భ్రష్టమైన, ధన రాశులు గోల్పడినన్, వనంబులన్
భోజ్యము దక్కకున్న, భృతి పూని శ్మశానము గొల్వ - నంగడిన్
త్యాజ్య మటంచు దార, సుతు నమ్మిన, పుత్రుడు దేవదేవు సా
యుజ్యము బొందినన్ - నియతి యుక్త "హరీందుడు" సత్య సంధుడే! #
మానసమందు గ్రుచ్చు నవమానమొ; వేదన గూర్చు భావమో;
కానగ రాని భారమయి, కంఠమునందున గద్గదంబునై,
ఆనక కన్నులందు సుడులౌచు పరిభ్రమమొందు నీరమై,
దీనముగా కనుంగవ యధీనము దప్పి స్రవించు ధారలై! #
లేదు భువిని సమస్యేది లేదు! లేదు!!
ఎట్టు లద్దానిని పరిష్కరించగలమొ -
తగిన యోచన మనసుకు తట్టనపుడు,
కానిపించు నదె సమస్యగా నరునకు!
లేదు భువిని సమస్యేది లేదు! లేదు!! #
నాటి "ప్రతాపరుద్రుని"కి; నాటి సుభక్తుడు "రామదాసు"కున్;
మేటి "తెలుంగు భోజున"కు; మేలిమి "పల్లవ", "చోళ" రేళ్ళకున్ -
దీటుగ నిల్చి, "యాదగిరి దేవళము"న్ నెలకొల్పె "కే.సి.యార్"!
నేటి తరంబులోన నిది నిక్కము! భూరి చరిత్ర యయ్యెడిన్! #
తలపై "వాటరు ఫాల్సు" ను,
విలువగు "ఎల్.ఈ.డి. లైటు"; వెలయగ నుదుటన్
నిలువుగ "సీ.సీ. కెమెరా" -
తలచిన కోర్కెలను దీర్చు దైవం బెవరో?
డా.ఆచార్య ఫణీంద్ర ముక్తక పద్యాలు