స్నేహ పరిమళము

 విశ్వకవి రవీంద్రనాథ్ టాగోర్ రచించిన ఒక చిన్న కవితకు,  నా శైలిలో .. సీస పద్యంలో అనుసృజన :

నేను మరణమొంద - నీవు నన్నెంతగా 

కీర్తించినన్, నాకు స్ఫూర్తి నిడదు!

నేను మరణమొంద - నీవు నా తప్పులన్ 

మన్నించిన, నది నా మది యెరుగదు!

నేను మరణమొంద - నీవు పుష్పాలెన్ని

నా మీద జల్ల, నా కేమి తెలియు?

నేను మరణమొంద - నీవెంతొ బాధతో

కన్నీరు గార్చ, నే కాంచ లేను!

బ్రదికి యుండగనే, నన్ను ప్రస్తుతించు -

తప్పులను క్షమించు - తగు సత్కార మిడుము -

కాంచి నన్ను ప్రేమముతోడ కరుణ జూపు -

భవ్యముగ మన స్నేహమ్ము పరిమళించ! #