శాస్త్రము - సంప్రదాయము

 ఈ కోవిడ్ కష్ట కాలంలో .. ఆధునికులు కొందరు ఆయుర్వేద వైద్యం ప్రామాణికతను ప్రశ్నిస్తున్న వేళ ... 

అణ్వింధన శాస్రవేత్తగా, ఆధునిక పద్యకవిగా నా అభిప్రాయం :

శాస్త్రము, సంప్రదాయమును చక్కగ మేళనమే యొనర్ప, అ
ణ్వస్త్రము, లమ్ము లెల్ల గల ఆధుని కార్జునుడౌ మనుష్యుడే!
శాస్త్రము, సంప్రదాయమును జ్ఞానమె! కావవి వేరు! నాటి ఆ

శాస్త్రమె సంప్రదాయముగ జ్ఞానులు చెప్పుదు రిప్డు ధాత్రిపై!

సరస సంభాషణం

ప్రతిదిన మేదియు పట్టించుకొనకుండ

     దినమెల్లయు దినపత్రికను చదువు

పతిని దెప్పిపొడుచు పన్నాగమే పన్ని

     పత్ని ఆ పతితోడ పలికె నిటుల -

"నేనొక దినపత్రి కైన బాగుండయో!

     దినమెల్ల మీ చేత మనెడి దాన!"

అది విని ఆ భర్త అంతకు మించిన

     వెటకారమున బల్కె విస్తుబోవ -

"ఓసి పిచ్చి దాన! ఒకటి మరచితీవు!

ప్రతి దినమొక క్రొత్త పత్రి కేను

చదువుచుందు గాని, చచ్చి గీ పెట్టినన్

మరుదినమున దాని మరల ముట్ట!" #

"రుచియైన తేనీరు" జీవితమ్ము!

అహము నావిరి గావించి; అనుభవమ్ము

లనెడి తేయాకు, చక్కెర లందు కలిపి;

మంచితనమన్న క్షీరమ్ము నెంచి చేర్చి;

తప్పులను వడగట్టి, బాధ తొలగించి

చేయు "రుచియైన తేనీరు" - జీవితమ్ము!