"ముందు అట్ట" మెరుగు

పుస్తకముల, జనుల మస్తకముల నెప్డు -
పైన జూచి కట్టవలదు విలువ!
"ముందు అట్ట" మెరుగు మోసపుచ్చగ వచ్చు;
లోన సారమేమి కానరాక!

ఆత్మ సంయమనం

బయటనున్న నీరు పడవ నెప్పుడు గూడ
ముంచబోదు! తేలి యుంచగలదు!
లోనికరుగు నీరు లోనికి ముంచును!
ఆత్మ సంయమనమె యగును రక్ష!!

క్రొత్త నడకలు

"నీరు పల్ల మెరుగు" - నిన్న, మొన్నటి మాట!
"నీరు పైకి పారు" - నేటి పాట!!
నదుల కిపుడు క్రొత్త నడకలు నేర్పెడు
"చంద్రశేఖరు"నికి సాటి యెవరు?

24 గంటలు

పొట్ట కూటికై పనిచేయ బూను కొరకు -
జీవితాశయ సాధన చేయు కొరకు -
తిండి నిద్రాదులను పొంద - దేవుడిచ్చె
ఎన్మి, దెన్మి, దెన్మిది గంట లిల నరునికి!

క్రొత్త లెక్క

క్రొత్త లెక్క జెప్పి విత్త మంత్రిణి గారు
ప్రాత లెక్క కూడ చేతబెట్టి,
ఎంచుకొనుడటంచు ముంచె సంశయమందు -
వేతనాల జనులు వెధవలైరి!!!

ఇల్లరికము

పడతి లక్ష్మికి పుట్టిల్లు పాల కడలి -

పలుకులమ్మకు పుట్టిల్లు బ్రహ్మ పురము -
పార్వతికి నట్లె కైలాస పర్వతమ్ము -
ఇల్లరికము తోడనె యయ్యె సృష్టి మొదలు!!!

చార్మినారు

నింగి ప్రియునిపై ప్రేమంబు పొంగి పొరల,
నేల జవరాలు నాల్గు హస్తాల జాచి
కౌగిలిడ గోరినట్లున్న కట్టడమ్ము -
జగతి పోతబోసిన సౌరు "చార్మినారు"!