కిటుకు

ఎవ్వరినైన నీ విష్టపడిన - వాని

          ఉల్లమలర, ప్రేమ నొలుకు మెపుడు!

ఎవ్వరినైన నీ విష్టపడని యెడ -

          తొలగి పో వానికి దూరముగను!

ఎవరైన నీవన్న ఇష్టపడిన - వాని

          కడు ప్రేమ మీరగా గౌరవించు!

ఎవరైన నీవన్న ఇష్టపడక యున్న -

          "ఓహో! సరే!" యని ఒప్పుకొనుము!

మానవుడు తన జీవన మార్గమందు

ఎపుడు సంతోషముగ నుండ నిదియె కిటుకు!

ఈ సమాజమందున ఎవ్వ డెప్పు డెట్టు

లింక ఏమన్న  గాని - బాధేమి లేదు! #

"ఓటు" బాధ్యత!

"ఓటు" హక్కె కాదు! "ఓటు" బాధ్యతనుచు -

"ఓటు" వేసినాడ నుత్సహించి!

ఒక్క "ఓటు" మార్చు నోటమి, గెలుపుల!

"ఓటు" వేయకున్న చేటు మనకె!!

                     

జో "జో బైడెన్"!

జోజో కమలా హారిస్!

జోజో! ఈనాటి కింక - జో "జో బైడెన్"!

జేజేలు మీకు! తదుపరి 

రోజులు శ్రమియించవలె - పురోగతి జూపన్!

                 - డా. ఆచార్య ఫణీంద్ర

            (పోతన గారికి నమస్సులతో ...)

దైవ లీల

ఎక్కడి నుండి రాక, ఇట ఈ భువి పైనొక బాటసారినై;

ఇక్కడ పుట్టు పిమ్మట, అనేక సమస్యల నెత్తి మోసి, నే

చక్కని ఆశయంబుల సుసాధనలో నిటు సాగి; ఇంక పై

నెక్కడికి కేగుదో? తుదకు నే పరమార్థమొ - దైవ లీలలో? #

చిత్రం!!!

నేల పైనె యున్న నిశ్చింతగా నుండు!

ఉన్నత పద మెక్క నుండు తృప్తి!!

అంచులపయి నిలిపి యాడింతువో దేవ!

చిత్రమయ్య నీవు చేయు లీల!!!

వగపు వాన

 

సెలవని మన గంధర్వుడు

ఇల వీడి పరమ్ము జేర నేగిన వేళన్ -

విలవిలలాడుచు ప్రకృతియు

వలవల విలపించె వగపు వానై కురియన్!

ఓడుచో ...

గెలుతువేని - ఆ ధైర్యమ్ము నిలుపుకొనుచు,

నాయకునిగా పలువురిని నడుపగలవు!

ఓడుచో - ఆ అనుభవమ్ము కూడగట్టి,

సూచనలిడుచు సరిదారి చూపగలవు! #