చాతురి

కూటికి లేనివా డిపుడు కోటికి తా పడగెత్తె! నాకు నా

బోటి స్వయంకృషిన్ సలుపబూనగ చేతయె గాక కాదు! నా

పాటి సమర్థవంతుడటు - పట్టుచు కాళ్ళు, స్తుతించి ముందరన్;

చాటున గోతి త్రవ్వగల చాతురి లేక చరించు నిట్టులే! #

నడత

చేత "గ్లాసు" బట్టి చెప్పేరు సత్యాలు
బారులోన త్రాగి వాగు వారు!
చేత "గీత" బట్టి చెప్పే రబద్ధాలు
కోర్టులోన వారె!! కూలె నడత!!!#

"ఆంధ్ర భారతి" నిఘంటువులు

ఆశుపద్యంబు ధారాపాతమై పొంగ,
ననుమాన మెదొ వచ్చి యాగిపోగ -
స్వీయ గ్రంథాలయ సీమలో వెదుకుచు
నేదొ యొక నిఘంటు వెత్తిపట్టి,
పదము నన్వేషించి పడగ పాట్లెన్నియో,
కాల హరణమునై - కడకు నలిగి,
ఆవేశమే చచ్చి, యా కైతకే యింక
స్వస్తి చెప్పిన దివసములు గుర్తు!

"ఆంధ్ర భారతి" వారి పుణ్యమున నిప్పు
డన్ని ప్రామాణిక నిఘంటు లమరి యొకట -
కొండయంత సౌకర్యంబు గూర్చె! ఇద్ది
కవుల పాలిట కల్పవృక్షమయి నిలిచె!! #

"ఆంధ్ర భారతి" వెబ్ సైట్ లో పలు నిఘంటువుల సముదాయాన్ని సమకూర్చిన
శ్రీ వాడపల్లి శేషతల్పశాయి గారికి,
శ్రీ కాలెపు నాగభూషణరావు గారికి,
ధన్యవాదాలు సమర్పిస్తూ ...

- "పద్య కళాప్రవీణ", "కవి దిగ్గజ"
   డా. ఆచార్య ఫణీంద్ర

నాటి కాలమే ...

నాటి కాలమం దనుకొంటి - "నాకు గూడ
మేటి కాలమొకటి వచ్చి మించు" ననుచు!
నేటి కాలమం దనుకొందు మాటి కిపుడు -
"నాటి కాలమే మేలని నేటి కంటె!"

నందమూరి స్మృతికి అంజలి

శ్రీరామ రూపమ్ము చేబూన నాతండు
   రాముడే కనుముందు ప్రకటమగును -
శ్రీకృష్ణ వేషమ్ము చేబట్ట నాతండు
   కృష్ణుడే కనువిందు కేళి సలుపు -
కర్ణ, సుయోధన, గాంగేయ, రావణ
   పాత్రల కాతండు ప్రాణ మొసగు -
జానపద కథలు, చారిత్రిక కథలన్
   రాచ ఠీవి నొలికి రాణ కెక్కు -

సాంఘిక కథా చలనచిత్ర జాలమందు
నవ రసాత్మక వైభవ నటన జూపు
"నందమూరి తారక రామ" నామ వరుని
జన్మదిన వేళ - స్మృతికి అంజలి ఘటింతు!

- డా. ఆచార్య ఫణీంద్ర 

భాస్కరా!

గగనములో ప్రచండ నవ కాంతి మహా కిరణాగ్ని కీలలన్
భగభగ మండి యుగ్రముగ భస్మ మొన ర్చిదె మండు వేసవిన్,
భుగభుగ మంచు వ్యాప్తి గొను భూతము - దుష్ట "కరోన" వైరసున్!
జగమున మానవాళి కిక సత్వర రక్షను గూర్చు భాస్కరా!

'మే'

"'ఏప్రిలు' నెల పిదప యే మాస మరుదెంచు?
'జూను' కన్న మునుపు నే నెల యగు?"
నంచు ప్రశ్న వేసినంత మేక కొకండు -
మేక బదులు చెప్పె 'మే' యటంచు!