అటు రచియించె భూమిసురుడైన మహాకవి పెద్దనార్యుడే
పటుతరమైన వర్ణన - ప్రబంధము పేర వినూత్న రీతిలో
స్ఫుటమగు కావ్యమందున ప్రఫుల్లము గాగ; మహాంధ్రభోజు డా
ఘటనము మెచ్చి మోదమున కాలికి దొడ్గగ గండపెండెమున్! #
అటు రచియించె భూమిసురుడైన మహాకవి పెద్దనార్యుడే
పటుతరమైన వర్ణన - ప్రబంధము పేర వినూత్న రీతిలో
స్ఫుటమగు కావ్యమందున ప్రఫుల్లము గాగ; మహాంధ్రభోజు డా
ఘటనము మెచ్చి మోదమున కాలికి దొడ్గగ గండపెండెమున్! #
ఏ పోలీసు తుపాకికిన్ బెదరకే, ఈవింక ఓ "గద్దరూ"!
నీ పాటన్ బ్రదుకెల్ల విప్లవ ధృతిన్ - నిప్పుల్ వెదంజల్లితో -
ఆ పోరాటపు గీత గాన కళ, నీ అంత్యక్రియన్ పొందెగా
ఆ పోలీసు తుపాకి వందనమునే అత్యంత మర్యాదగా!
(ప్రజా వాగ్గేయకారుడు "గద్దర్" కు కడసారి కన్నీటి వీడ్కోలుగా ...)
అరువదేళ్ళ వయస్సు వ్యక్తి ఒంటరిగున్న -
వేదాంతమె తలచు - వృద్ధుని వలె!
అరువదేళ్ళ వయస్సు వ్యక్తు లిరువురున్న -
హాస్య మాడు - నడి వయస్కుల వలె!
అరువదేళ్ళ వయస్సు వ్యక్తులు మువురున్న -
ఉత్సాహమున దేలు యువకుల వలె!
అరువదేళ్ళ వయస్సు వ్యక్తుల్ నలువురున్న -
పరుగు లిడుచు నాడు బాలల వలె!
అరువ దన్నది వారి వయస్సు వరకె!
తరచుగా స్నేహితుల చెంత కరుగుచుండి,
సరస సంభాషణల నదిన్ సాగిపోవ -
మనసులో యౌవనపు టలల్ మరల పొంగు! #
భారతీయ మూలాలున్న అమెరికన్ పౌరులకు పద్య రూపంలో నా ఉపదేశం :
"""""""""""""""""""""""""""""""""""""""""""""
పుట్టిన దేశమున్ మరియు పూని ఉపాధిని కోరి చేరగా
పట్టుమటంచు వృత్తి నిడి, పౌరులుగా గురుతించు దేశమున్ -
ఎట్టి మనుష్యుడైన నయనేంద్రియ యుగ్మము వంటి వంచు, తా
గట్టిగ గుండెలో నిలిపి, గౌరవ భావము జూపగా వలెన్! #
దుష్టు లొనరించు దౌర్జన్య, ద్రోహములను
కాంచి భూమాత భరియింప గలదు గాని,
మహిత మేధావు లది గాంచి మౌనమూన -
కాంచి, వెక్కెక్కి తా విలపించు గాదె! #
లంచ మిచ్చువాడు కొంచె మటు దిరిగి
"ఫోన్-పె" చేయగ, పని పూర్తి యయ్యె!
ఢిల్లి ప్రోత్సహించు "డిజిటలు పేమెంట్స్" -
సులువు జేసె నిపుడు ఖలుని పనులు! #
తనువు మీది అంగి తడిసి ముద్దైపోవు!
విప్పి, నిమిష మారవేయ నెండు!
వేసవి నెలలందు వింత - బట్టల గోడు!
చెడుగు డాడును రవి చెమట గుప్పి! #
డా.ఆచార్య ఫణీంద్ర ముక్తక పద్యాలు