'పునుగు పిల్లి'

వలదు జన్మమ్ము నాకింక వలదు మరల!
"తగదు - జన్మమ్మునొందక తప్ప"దన్న -
తిరుమలేశునికి సుగంధ పరిమళమిడు
'పునుగు పిల్లి'గా నేనింక పుట్టదలతు!

'పాంచజన్యం'

పాలిడెడి నెపమున వచ్చి ‘పూతన‘ తనన్
చంప గోరి, నోట స్థనము గ్రుక్క -
భావి నొత్త బోవు పాంచజన్యంబుగా
తలచు బాలకృష్ణు గొలతు మదిని!

భూసురుడు

భూసురుడైనవాడు ఫల భూజము వోలె పరోపకారమే
ధ్యాసగ నిల్పి, జ్ఞాన సముపార్జన సల్పి, జగద్ధితంబుకై
భాసురమైన సత్కృతుల బాగుగ చేసి తరించగావలెన్!
భూసురు డట్లు కానియెడ భూసురుడౌనె? నిశాచరుం డగున్!

సుమనోహరునిన్ ...

వేమరు నే భజియింతును
భూమియు, గగనముల నిండు భూరి శరీరుం
డై - ముఖమున నయనాల్ రవి
సోములు గాన్ - జనుల గాచు సుమనోహరునిన్!