’హీరొ’

విలువలను కాలరాయగా కలిగినట్టి
విజయమది యొక్క విజయమా? ’విలనిజమ్ము’!
విజయమొందకున్న, విలువల్ వీడకుండ
ఎవడు నిలుచునో, వాడె పో - ’హీరొ’ నాకు!

ఆత్మ బలము

కురియు వర్షమ్ము నాపదు గొడుగు - కాని,
అందు నిలుచుండు ధైర్యమ్ము నందజేయు!
ఆప దరుదెంచు కష్టమ్ము నాత్మ బలము;
దాని నెదురొడ్డి పోరాడు ధైర్య మిచ్చు!!

తెరచుకొనకున్న...

చీకటి గదిని మూసియుంచి, మరి బయట
ఎన్ని దీపాలు వెలిగింప నేమి ఫలము?
తెరచుకొనకున్న హృదయమ్ము, నరయ నింక
ఎన్ని గ్రంథాలు పఠియింప నేమి ఫలము?

సంక్రాంతి సంబరములు

రైతన్న యేడాది శ్రమశక్తి ఫలముగా
చనుదెంచు సౌవర్ణ్య సస్యలక్ష్మి -
పడతి చేతుల నుండి వాకిళ్ళ ప్రవహించు
రాటుదేలిన విద్య రంగవల్లి -
బుడబుక్కవా డూదు బూర గానమ్ముతో
ఘల్లుఘల్లున గెంతు గంగిరెద్దు -
”హరిలొ రంగో హరీ హరి” యంచు కీర్తించు
హరిదాసు మ్రోయించు చిరత రవము -

గగనమున బాలు డాడించు గాలిపటము -
పొంగలి, చకినా, లరిసెల పొడము రుచులు -
పల్లె పల్లెన్ ప్రతీకలై పరిఢవిల్లి
చాటును మకర సంక్రాంతి సంబరములు!


విశ్వవ్యాప్తంగా విస్తరిల్లి విరాజిల్లుతున్న తెలుగు వారందరికి
సంక్రాంతి పర్వదిన శుభాభినందనలతో -
డా. ఆచార్య ఫణీంద్ర

ఆలుమగలు

పూలును, పరిమళముల వలె -
పాలును, మీగడల వోలె - భాస్వంత శర
త్కాల శశియు, వెన్నెల వలె -
ఆలుమగలు కలసిమెలసి యలరారవలెన్!

నూతనాంగ్ల వత్సర శుభాభినందనలు

శీతల మాధురీ ఫల విశేషములో! సుఖ సంతసంబులో!
చేత ధరించి మీ మధుర జీవన ప్రాంగణమందు నిల్చెగా
నూతన కాల కన్యక వినూతన వత్సర వస్త్ర శోభతో -
ప్రీతిని స్వాగతంబిడుడు! ప్రేమము మీర శుభాల మీ కిడున్!

రామ భక్తి in every walk of life

వింతగ రోజు ... ‘ఆఫిసు‘కు వెళ్ళెడి నాకు కలమ్ము కాన రా;
దెంతొ గవేషణన్ సలుప నెచ్చటొ యేదొ కలమ్ము జిక్కు - “అ
ద్దింతకు వ్రాయునా?“ యనుచు నేర్పడు శంకయె దీర, ‘రామ‘ యం
చంత లిఖించి చూతు - అటు లబ్బు నదెంతటి పుణ్యమో గదా!