19, డిసెంబర్ 2019, గురువారం

ఇల్లరికము

పడతి లక్ష్మికి పుట్టిల్లు పాల కడలి -
పలుకులమ్మకు పుట్టిల్లు బ్రహ్మ పురము -
పార్వతికి నట్లె కైలాస పర్వతమ్ము -
ఇల్లరికము తోడనె యయ్యె సృష్టి మొదలు!!!

2, డిసెంబర్ 2019, సోమవారం

చార్మినారు


నింగి ప్రియునిపై ప్రేమంబు పొంగి పొరల,
నేల జవరాలు నాల్గు హస్తాల జాచి
కౌగిలిడ గోరినట్లున్న కట్టడమ్ము -
జగతి పోతబోసిన సౌరు "చార్మినారు"! 

30, నవంబర్ 2019, శనివారం

దహించగావలెన్!!!


కాంతను గాంచినంతటనె కామము రేగి, దరిద్ర బుద్ధితో
సుంతయునైన జాలి, దయ శూన్యమునై, తమ  కోర్కి దీరగా
నింతటి హీనమైన పని కిట్టుల బూనియు, చంపి, కాల్చు నా
హంతలు, నీచులౌ యువకులందరి నట్లె దహించగావలెన్!

[హైదరాబాదులో ఇటీవల శంషాబాదు ప్రాంతంలో రాత్రి 9 గంటల సమయంలో ఒక వెటర్నరీ డాక్టరు యువతిని నలుగురు దుండగులు (లారీ డ్రైవర్లు, క్లీనర్లు) దారుణంగా మానభంగం చేసి, పెట్రోల్ పోసి తగులబెట్టి, కిరాతకంగా హత్య చేసిన సంఘటనకు నిరసనగా ...]

15, నవంబర్ 2019, శుక్రవారం

వింత!!!

భోజనమ్ము కొనుట - పూర్వికులకు వింత!
త్రాగు నీరు కొనుట - తాత వింత!
పీల్చు గాలి కొనుట -వింత నేడు మనకు!
ప్రతిది రాను రాను వర్తకమయె!!!

5, నవంబర్ 2019, మంగళవారం

"సమవర్తి"


న్యాయ మడుగబోవ, "న్యాయమూర్తి" పదాన
ఏకపక్షవర్తియె తగులునెడ -
దాని కన్న నింక దౌర్భాగ్యమే లేదు!
అవనిని "సమవర్తు" లరుదు గాదె!! 

6, సెప్టెంబర్ 2019, శుక్రవారం

సుదినము


ఉదయమె నిద్ర లేచి, బహుళోత్తమ కాయ పరిశ్రమంబుతో
పదిలము జేసి శ్వాస, భగవంతుని గొల్చి ప్రశాంత తత్త్వమున్
హృదయమునందు గూర్చి, మన వృత్తిని చక్కగ నిర్వహించుచున్,
పదుగురికిన్ సహాయపడి, బాగుగ రాత్రిని నిద్రబోవుచో -
అది సుదినంబుగా నిలుచు! అంతకు మించియు నేమి కావలెన్?

31, ఆగస్టు 2019, శనివారం

ఏ దివ్య పాదాలు ...



ఏ దివ్య పాదాల నిల్లాలునై లక్ష్మి
   సతము సేవించుచు సంతసిల్లె -
ఏ దివ్య పాదాల నింపుగా జన్మించి
   గంగా నది భువి కుప్పొంగి చేరె -
ఏ దివ్య పాదంబు లెల్ల లోకాల్ నిండి
   దానవాధిపుని పాతాళమంపె -    
ఏ దివ్య పాదా లొకింత తాకిన యంత
   శిల మారి యయ్యె సౌశీల్యవతిగ -

ఎట్టి దివ్య పాదంబుల నెంతొ భక్తి
బ్రహ్మ రుద్ర శేష గరు డేంద్ర హనుమంత
సురలు, మునులు గొలిచి పుణ్య ఝరుల దేలి
రట్టి దివ్య పాదాలె నా కభయ మొసగు!

    

27, ఆగస్టు 2019, మంగళవారం

పిల్ల కోతి

 
"కన్నులన్ జూతుమా? కడు పెద్దగానుండు -
   చిన్నగా నుండవు చిత్తమలర!
ఒంటిపై జూతుమా? ఒక కొన్ని వెంట్రుకల్
    కనుల కింపును గొల్ప కానరావు!
మూతినే చూతుమా? ముత్య మంతే యుండు -
     ఉబ్బెత్తు సొగసుల నొలకబోదు!
కటి క్రింద వెనుకగా కనిపించదాయెను -
     బహు దీర్ఘముగ నొక వాలమైన!

తల్లి జానకీ దేవిని తలచినంత
లోక మెల్లయు కీర్తించు నేక ధాటి,
యేల 'జగదేక సుందరియే!' యని?" - యని
విస్తుబోయెను మున్నొక పిల్ల కోతి!!

11, ఆగస్టు 2019, ఆదివారం

సైనికుని మనోగతం

భూరి యశోవిశాలమగు భూమిని బుట్టిన వారలందు నీ
భారత దేశ రక్షణము బాధ్యతగా గల కొల్ది మందిలో
ధీరుడనై పవిత్రముగ దేశ సుభక్తిని మానసంబునన్
ధారణ జేసి, నిర్వహణము దాల్చెడు నేను నొకండ - గర్వమౌ! 

18, జులై 2019, గురువారం

వాడే ...


వాడే నను కాపాడెడి
వాడని - వాడని తలంపు పారుచునుండెన్
నాడును, నేడును, మరి యే
నాడును నాలోని జీవనాడుల యందున్!

28, మే 2019, మంగళవారం

ఎన్.టి.ఆర్. జయంతి సందర్భంగా నివాళి!

అందమొ - దైవ దత్తమది! ఆ పయి వాచికమా - అనన్యమౌ!
సుందర రూపమై వెలయు - చూడగ నెయ్యది వేషమూనినన్!
అందు నటించెనా - హృదయమందున హత్తుకపోవు తథ్యమై!
అందరు మెచ్చ - పొందె నజరామర కీర్తిని "నందమూరి" యే!

(స్వర్గీయ ఎన్.టి.ఆర్. జయంతి సందర్భంగా ...)

- "పద్య కళాప్రవీణ", "కవి దిగ్గజ"
   డా. ఆచార్య ఫణీంద్ర




2, మే 2019, గురువారం

గుండె నిబ్బరము


చుట్టు పొంచియున్న దట్టమౌ గుబురులన్
పొడుచుకొని నిలిచెడు ముళ్ళ నడుమ -
నవ్వు చిరుగులాబి పువ్వు గాంచి నరుడు
నేర్వవలయు గుండె నిబ్బరమును! 

29, ఏప్రిల్ 2019, సోమవారం

పరమత సహనము

క్రైస్తవుల్ పేదల కలుపుకొంచు తమలో
    అవమానపరిచిరి - హైందవులను!
హిందువు లుద్రేక మెచ్చి, దాడులొనరిం
    చిరి - ముస్లిములును, మస్జిదుల పైన!
ముస్లిముల్ ద్వేషమ్ము ముదిరి, "జిహాదం"చు జరిపిరి హింస - క్రైస్తవుల పైన!
బౌద్ధుల వెంటాడి పారద్రోలిరి నేడు
      కమ్యునిస్టులు "టిబెట్" గడ్డ నుండి!

ఎవ్వరి యభిమతము నవ్వారిదని యెంచు
"పరమత సహనమ్ము" పనికి రాదొ?
సాటి మతము పట్ల సానుభూతి కరువై
మంట గలియుచుండె మానవతయె!

(శ్రీలంకలో ఈస్టర్ పర్వదినం నాడు జరిగిన మారణహోమానికి కలచిన హృదయంతో ...)

-  డా. ఆచార్య ఫణీంద్ర

8, ఏప్రిల్ 2019, సోమవారం

కళ్ళజోడు

సఫలమయ్యె నేత్రమ్ముపై శస్త్రచర్య!
మార్గదర్శి, నలుబదేండ్ల మత్సహచరి -
"కళ్ళజోడు"ను విడనాడు కాల మిపుడు
కలుగు నొక కంట ముద, మొక కంట బాధ!!


20, మార్చి 2019, బుధవారం

అనుభవాల రంగులు!


రంగురంగుల "హోళి" పర్వ దినమందు
చెంగుచెంగున ఎగిరిన చిన్ననాటి
అనుభవాల రంగులలోన మునిగి తేలి -
అందజేతు "హోళి" శుభాభినందనలను! 

4, మార్చి 2019, సోమవారం

చమత్కార పద్యం



తురక మతంబున బుట్టియు
చిరకాలము పేరుగాంచె సినిమా నటిగాన్ !
తెరపై హిందూ స్త్రీయై,
వరలక్ష్మీ వ్రతముఁ జేసె వహిదా రెహమాన్ !

20, ఫిబ్రవరి 2019, బుధవారం

ఛందస్సు

ఏ ఛందస్సును నన్నయాది కవులే యెంతే నుపాసించిరో -
ఏ ఛందస్సున భారతాది కృతుల న్నింపార వర్ణించిరో -
ఏ ఛందస్సు సరస్వతీ జననికి న్నీడేరు సద్రూపమో -
ఆ ఛందస్సున కైతలల్లు కవిగా నైతిన్ మహా ధన్యుడన్!

29, జనవరి 2019, మంగళవారం

నీటి యాజమాన్యం


పొంగిపొర్లు నదిని ముంచి, బిందెల తోడ
         నీరు తెచ్చుకొనెను నీదు తాత!
బావిని త్రవ్వించి బక్కెట్ల కొలదిగా
         నీరు తోడుకొనెను నీదు తండ్రి!
"నల్లా" ను పెట్టించి, బిల్లులన్ చెల్లించి,
         నీరు పట్టుకొనెను నీదు భ్రాత!
పంపు బోరున దింపి, నింపి వాటరు ట్యాంకు,
         నీరు వాడుకొనును నీదు తరము!

నీటి బాటిల్సు కొను నింక - నీదు సుతుడు!
ఇంత కింతకు నిది యింక నెటకు బోవు?
నీటి యాజమాన్య మెరిగి నెరపకున్న -
నీరు కాదు .. నీ కింక కన్నీరె మిగులు!
నీరు గారిపోవు నరుడా! నీదు బ్రతుకు!!