మనిషి సంతసమును మహిని పొందు కొరకు
రెండు విధము లనుసరించవచ్చు!
ఒకటి - మార్చి యప్పుడున్న పరిస్థితిన్;
రెండు - మార్చి మతిని రేగు స్థితిని! #
మనిషి సంతసమును మహిని పొందు కొరకు
రెండు విధము లనుసరించవచ్చు!
ఒకటి - మార్చి యప్పుడున్న పరిస్థితిన్;
రెండు - మార్చి మతిని రేగు స్థితిని! #
అంకము జేరి నా మనుమ డాసన మన్నటు కూరుచుండి, బా
ల్యాంక విచేష్టతోడ శిర మంతట ప్రక్కకు వంచి గోముగా;
పంకజ నాభుడే శిరము వంచి జగత్తును గాంచినట్టు, లా
వంక గలట్టి టీ.వి. గని, భవ్యముగా చిరునవ్వు చిందెడిన్!
ఎవరినైన పూర్తిగ నమ్మి తేని నీవు,
దక్కు నేదొ యొక్కటి జీవితమున నీకు -
మరచిపోలేని గుణపాఠమైన! లేక,
చెరగిపోనట్టి ఒక మంచి స్నేహమైన!!
అంకెల నొక పద్ధతిలో
సంకలనపరచు "సుడోకు" సత్క్రీడకు తా
నంకతి - "మాకీ కాజీ"!
అంకించి నివాళు లిడెద నాతని మృతికిన్!
("జపాన్" దేశ మేధావి, "సుడోకు" సృష్టికర్త -
శ్రీ "మాకీ కాజీ" మృతికి సంతాపంగా!)
జ్ఞానము, మేధ కావు; అధికారిగ నెప్పుడు కల్గియున్నచో
దీనుల వేదనన్ వినెడు దీక్షను బూనిన కర్ణ రాజముల్;
ధ్యానము నిల్పి వారికి సహాయము చేసెడి మానసంబునున్ -
మానవు డెవ్వడైన మహిమాన్విత మూర్తిగ కీర్తి గాంచురా! #
మాన్య ఋషీశ్వరుండు; నిగమంబుల దివ్య విభాజనంబుతో
ధన్యత గాంచి, భారత కథా కృతి కర్తగ వెల్గు వ్యాసు డీ
పుణ్య దినంబునైన 'గురు పూర్ణిమ' నాడె జనించె! ఎట్టి సౌ
జన్య ఫలంబొ! ఈ దినమె జన్మము నొందితి నేను సైతమున్! #
ప్రతిదిన మేదియు పట్టించుకొనకుండ
దినమెల్లయు దినపత్రికను చదువు
పతిని దెప్పిపొడుచు పన్నాగమే పన్ని
పత్ని ఆ పతితోడ పలికె నిటుల -
"నేనొక దినపత్రి కైన బాగుండయో!
దినమెల్ల మీ చేత మనెడి దాన!"
అది విని ఆ భర్త అంతకు మించిన
వెటకారమున బల్కె విస్తుబోవ -
"ఓసి పిచ్చి దాన! ఒకటి మరచితీవు!
ప్రతి దినమొక క్రొత్త పత్రి కేను
చదువుచుందు గాని, చచ్చి గీ పెట్టినన్
మరుదినమున దాని మరల ముట్ట!" #
అహము నావిరి గావించి; అనుభవమ్ము
లనెడి తేయాకు, చక్కెర లందు కలిపి;
మంచితనమన్న క్షీరమ్ము నెంచి చేర్చి;
తప్పులను వడగట్టి, బాధ తొలగించి
చేయు "రుచియైన తేనీరు" - జీవితమ్ము!
విశ్వకవి రవీంద్రనాథ్ టాగోర్ రచించిన ఒక చిన్న కవితకు, నా శైలిలో .. సీస పద్యంలో అనుసృజన :
నేను మరణమొంద - నీవు నన్నెంతగా
కీర్తించినన్, నాకు స్ఫూర్తి నిడదు!
నేను మరణమొంద - నీవు నా తప్పులన్
మన్నించిన, నది నా మది యెరుగదు!
నేను మరణమొంద - నీవు పుష్పాలెన్ని
నా మీద జల్ల, నా కేమి తెలియు?
నేను మరణమొంద - నీవెంతొ బాధతో
కన్నీరు గార్చ, నే కాంచ లేను!
బ్రదికి యుండగనే, నన్ను ప్రస్తుతించు -
తప్పులను క్షమించు - తగు సత్కార మిడుము -
కాంచి నన్ను ప్రేమముతోడ కరుణ జూపు -
భవ్యముగ మన స్నేహమ్ము పరిమళించ! #
ఇంద్ర ధనువు కరిగి ఇల జారె వర్ణాలు -
జనులు మోములందు చల్లుకొనగ!
"హోళి" పర్వ దినము నుత్సాహ ముప్పొంగె -
అందరికి శుభాభినందనములు
మైత్రి యన్న దొక్క మంచి పుస్తక, మందు
నుండ గల దపార్థ మొక్క పుటగ!
ఒక్క పుటను గూర్చి ఉన్న పుస్తకమును
మొత్తమున్ విడుచుట మూర్ఖతగును!!
ఎవ్వరినైన నీ విష్టపడిన - వాని
ఉల్లమలర, ప్రేమ నొలుకు మెపుడు!
ఎవ్వరినైన నీ విష్టపడని యెడ -
తొలగి పో వానికి దూరముగను!
ఎవరైన నీవన్న ఇష్టపడిన - వాని
కడు ప్రేమ మీరగా గౌరవించు!
ఎవరైన నీవన్న ఇష్టపడక యున్న -
"ఓహో! సరే!" యని ఒప్పుకొనుము!
మానవుడు తన జీవన మార్గమందు
ఎపుడు సంతోషముగ నుండ నిదియె కిటుకు!
ఈ సమాజమందున ఎవ్వ డెప్పు డెట్టు
లింక ఏమన్న గాని - బాధేమి లేదు! #
డా.ఆచార్య ఫణీంద్ర ముక్తక పద్యాలు