"అరువదిలో ఇరువది!"

అరువదేళ్ళ వయస్సు వ్యక్తి ఒంటరిగున్న -

   వేదాంతమె తలచు - వృద్ధుని వలె!

అరువదేళ్ళ వయస్సు వ్యక్తు లిరువురున్న -

   హాస్య మాడు - నడి వయస్కుల వలె!

అరువదేళ్ళ వయస్సు వ్యక్తులు మువురున్న -

   ఉత్సాహమున దేలు యువకుల వలె!

అరువదేళ్ళ వయస్సు వ్యక్తుల్ నలువురున్న -

   పరుగు లిడుచు నాడు బాలల వలె!

అరువ దన్నది వారి వయస్సు వరకె!

తరచుగా స్నేహితుల చెంత కరుగుచుండి,

సరస సంభాషణల నదిన్ సాగిపోవ -

మనసులో యౌవనపు టలల్ మరల పొంగు! #