నిజము పలుకువాడు ...

నిజము పలుకువాడు నిష్ఠురమ్ముగ తోచు -
పిచ్చివాడని వెలివేయుచుంద్రు !
నీతిగా వెలిగెడి నిప్పును ముద్దాడు
ధైర్య మెవరి కుండు ధరణి మీద ?

VOTE FOR BETTER INDIA

తిట్టు కవిత్వం -7

న్యాయము చేసినట్టి పరమాత్ముని నిర్ణయ మద్ది! దాని న
న్యాయముగా తలంచి, కసి నా పయి జూపుచు, వ్యాఖ్య 'స్పాములన్'
నా యెడ 'బూతు' బాణముల నాటుచు 'సంకర' నామధేయుడే
గాయము చేసె నా హృదికి! గాడిద ...  వాడిక నాశనంబగున్! 

స్వర్ణపతకం

స్వర్ణపతకమన్న స్వర్ణకారు డెవండొ

వెలయజేయు పసిడి బిళ్ళ కాదు -

కార్యదీక్ష, చెమట, గట్టి సంకల్పమున్

కలసి పోరి, పొందు 'గెలుపు గుర్తు' ! 

ధర్మమునకె జయము దక్కె గాదె!

కంటిలోన 'పెపరు' కారమ్మునే గొట్టి,
"కలిపియుంచెద"మని గర్జసేయు
కఠినచిత్తుల కిక కనులు బైరులు గ్రమ్మె!
ధర్మమునకె జయము దక్కె గాదె!

జై తెలంగాణ!
జై జై తెలంగాణ!!

సంక్రాంతి సంబరములు ... !

రైతన్న యేడాది శ్రమశక్తి ఫలముగా

చనుదెంచు సౌవర్ణ్య సస్యలక్ష్మి -

పడతి చేతులనుండి వాకిళ్ళ ప్రవహించు

రాటుదేలిన విద్య రంగవల్లి -

ఘల్లుఘల్లున కాళ్ళ గజ్జెలన్ కదిలించి

గంగిరెద్దులు నాడు గంతులాట -

హరినామ సంకీర్తనానందమును పంచు

హరిదాసు మ్రోయించు చిరత రవము -

గగనమున బాలు డాడించు గాలిపటము -

వైష్ణవాలయంబుల పాడు పాశురములు -

అరిసె, చకినమ్ము, పొంగలి యమృత రుచులు -

పల్లెపల్లెన్ ప్రతీకలై పరిఢవిల్లి

చాటవే నేటి సంక్రాంతి సంబరములు!

చాటవే మేటి సంక్రాంతి సంబరములు!!

అందరికీ సంక్రాంతి పర్వదిన శుభాకాంక్షలతో

- డా. ఆచార్య ఫణీంద్ర

పద్య సుధ

నిండియు నిండకుండనె కనీసము బాల్యము గూడ నాకు, మున్
గుండెకు చిల్లు బడ్డదని ఘొల్లున యేడ్చిన నాదు తల్లితో -
"ఉండవె అమ్మ! అంతగ మనోవ్యథ యేలనె? చిల్లు బడ్డచో,
దండిగ లోని పద్య సుధ ధారగ కారు" నటంచు పల్కితిన్!