"కన్నయ"

కన్నయ నొక కరమున, నీ
కన్నయ నింకొక కరమున గలిగి కదలెదో -
కన్నయ నమ్మిన యెడ, నీ 
కన్నయ కిక కడుపు నిండు గదనే తల్లీ!

"అక్కా తమ్ముల బంధము"

అక్కా తమ్ముల బంధము
చిక్కని స్నేహానుబంధ సీమల కన్నన్
మిక్కలి పై స్థాయిని పెం
పెక్కిన చక్కని విశిష్ట ప్రేమామృతమౌ!

అస్తిత్వం

నన్ను నేను వెదికి, నా కగుపింపక

చిన్నబోయినాడ నిన్నినాళ్ళు!

రమ్మిక తెలగాణ రాష్ట్రమా! నీవింక

నన్ను వెదికి ఇమ్ము నాకు మరల! 

పోల'వరమా' ? శాపమా ?

మూడవ పంట కోసమని ముంచగ నెంచిరి ప్రక్క రాష్ట్రమం
దేడు విశాల మండలము, లెంత విషాదము ! ఆంధ్ర నాయకుల్
గూడెపు టాదివాసులట గుండెలు బాదుకొనంగ కానరో ?
ఏడుపు కళ్ళనీళ్ళపయి ఎత్తుగ 'డ్యామ'ట ! సిగ్గు చేటయో !

నందమూరి సాటి నందమూరి!!!

భక్తవరుడు గాని, భగవంతుడును గాని,
రైతు గాని, గొప్ప రాజు గాని,
వృద్ధుడైనను, యువ వీరుడైన - నటనన్,
నందమూరి సాటి నందమూరి!
(నేడు NTR జయంతి)

సత్యము ...

నరకమైన నేమి ? నగ్నసత్య మగుచో -
దాని స్వీకరింతు ధైర్యముగను !
స్వర్గతుల్య మది - అసత్యమైన యెడల -
దాని ఛీత్కరింతు ధర్మమనగ !

డబ్బు పిచ్చి

డబ్బు కొరకు పెద్ద 'డ్రామాల' నాడేరు -
ఒక్క మాట వెనుక, నొకటి ముందు !
ఉన్న మాట పలుక ఉలికిపా టెక్కువ !
గబ్బు రేపు జనుల డబ్బు పిచ్చి !